Spektrofotometrik üsullarla dəmirin(II, III) 2,6-ditiol-4-alkilfenollarla (2,6-ditiol-4-metilfenol və 2,6-ditiol-4-tret-metilfenol) və hidrofob aminlərlə kompleksəmələgəlmə reksiyası tədqiq edilmişdir. Hidrofob amin kimi anilin, N-metilanilin və N,N-dimetilanilin istifadə edilmişdir. Müxtəlifliqandlı komplekslərin əmələgəlmə və ekstraksiya şəraiti tədqiq edilmiş və komplekslərdə komponentlərin nisbəti müəyyən edilmişdir. Müxtəlifliqandlı komplekslər zəif turş mühitdə əmələ gəlir (pHopt=4.0–5.4). İşıqudma spektrində maksimum 560–575 nm-də müşahidə olunur. Molyar işıqudma əmsalı e=(3.12–3.57)×104. Alınan nəticələr əsasında torpaqda, ətdə və təbii sularda dəmirin təyini üçün fotometrik metodikalar işlənib hazırlanmışdır. Təklif olunan metodikalar nəticələrin yaxşı təkrarlanması və aşağı təyinetmə həddi ilə xarakterizə olunur.