Məqalədə ilkin yüksək sıxlıqlı polietilenin və onun alüminium tozu ilə doldurulmuş kompozisiyalarının ərintisinin axınının reoloji xüsusiyyətlərinin tədqiqinin əsas prinsipləri nəzərdən keçirilmişdir. Metal-polimer sistemlərinin uyğunluğunu yaxşılaşdırmaq üçün 5.6 kütlə % malein anhidridi tərkibli yüksək sıxlıqlı polietilen calaq birgə polimeri kompatibilizator olaraq istifadə edilmişdir. İlkin yüksək sıxlıqlı polietilenin və 0.5 kütlə % və 5.0 kütlə % alüminium tozu tərkibli kompozitlərin axın əyriləri, effektiv özlülüyün yerdəyişmə sürətindən asılılıqları müəyyən edilmişdir. Arrenius koordinatlarında ərintinin effektiv özlülüyünün temperaturdan asılı olaraq dəyişməsinin qanunauyğunluğu müəyyən edilmişdir. Alınan əyrilər əsasında özlü axının aktivləşmə enerjisinin qiyməti müəyyən olunmuşdur. Kompozitlərin ekstruziya və təzyiq altında tökmə üsulları ilə emalına yaxın yüksək yerdəyişmə sürətində özlülük göstəricinin qiymətinin dəyişməsini proqnozlaşdırmağa imkan verən özlülük xüsusiyyətlərinin temperatur-invariant asılılığı qurulmuşdur
doi.org/10.32737/0005-2531-2022-2-40-46