Pirazin və triazin ilə modulyasiya edilmiş tripiridildiamin liqandından 6-fenil-N²,N⁴-di(pirazin-2-il)-1,3,5-triazin-2,4-diamindən (H₂dpztzda) istifadə edərək, yeni birnüvəli mis(II) kompleksi [Cu(H₂dpztzda)(NO₃)₂]∙2C₃H₇NO 1 sintez edilmiş, quruluşu müəyyənləşdirilmiş və antimikrob xassələri tədqiq edilmişdir. Monokristal rentgen struktur analizinə əsasən 1 kompleksində Cu(II) beşli koordinasiya olunub və təhrif olunmuş triqonal bipiramidal həndəsi ətrafda yerləşir. Kompleks üçün "ters çevrilmiş tip"  EPR spektri (g_┴ > g_||~ g_e), ölçülmüş maqnit nüfuzluluğu və eıektron spektroskopik tədqiqatların nəticələri birlikdə quruluş analizi ilə tam uyğunluq təşkil edirlər. Addison parametrinin hesablanmış qiyməti də (τ₅ = 0,5) Cu(II) mərkəzinin təhrif olunmuş triqonal bipiramidal həndəsi ətrafa malik olduğunu göstərir. H₂dpztzda molekulu Cu(II) ionunu tridentat liqand kimi koordinasiya edir. Kompleks 1 iki növ hidrogen rabitəsi nümayiş etdirir: klassik və qeyri-klassik. Göstərilmişdir ki, C-H‧‧‧π, π-π və hidrogen rabitələrini əhatə edən qarşılıqlı təsirlər sintez edilmiş kompleks 1-in kristal qablaşdırılmasına(packing) əhəmiyyətli dərəcədə təsir edir və supramolekulyar quruluşun formalaşmasında həlledici rol oynayır. Birləşmələrin antimikrob aktivliyi ənənəvi zonal diffuziya üsulu ilə qiymətləndirilmişdir. Antimikrob aktivliyi üçün təhlil edilən hər iki birləşmə (kompleks 1 və H₂dpztzda liqandı) sürtkü və soyuducu maddələrdə Pseudomonas aeruginosa, Mycobacterium phlei, Aspergillus niger və Penicillium chrysogenum mikroorqanimlərinə qarşı yüksək effektiv nəticələr göstərmişdir.

doi.org/10.32737/0005-2531-2025-4-23-33