Katalitik krekinq prosesindən alınmış (KQKA) ağır qazoyl fraksiyasının təmiz halda və onun pambıq yağı ilə qarışığının 550-700⁰C temperatur intervallarında termokatalitik çevrilməsi nəticəsində C₂–C₄ aşağı molekullu olefinlərinin alınma prosesi tədqiq olunmuşdur. KQKA fraksiyasının təmiz halda 700⁰C temperaturda termokatalitik çevrilməsi zamanı Omnikat-210P və Omnikat-210P/halloizit qarışıq katalizatorları istifadə olunduqda uyğun olaraq etilenin çıxımında 16.1–16.4%, propilendə isə 6.3–6.1% küt.artım olmuşdur. Bu fraksiyaya 10% pambıq yağı əlavə olunduqda 700⁰C-də Omnikat-210P və Omnikat-210P/halloizit qarışıq katalizatorları iştirakında uyğun olaraq etilenin 3–2.8%; propilenin isə 0.6–1.4% kütlə artmasına səbəb olmuşdur.