Orta molekul kütləsi 200 kDa olan qummiarabik və 40000 olan polietilenqlikol eləcədə 200 kDa olan xitozan mühitində kiçik qatılıqlı NaBH₄ və HCOOH məhlulları iştirakı ilə 293–353 K temperatur intervalında, müxtəlif reaksiya müddətində Ag⁰ nanohissəciklərinin alınması və stabilləşdirilməsi həyata keçirilmişdir. Alınmış gümüş nanohissəciklərin ölçüləri rentgen-faza analizi ilə tədqiq edilmişdir. Müəyyən olunmuşdur ki, stabilləşdirici kimi polietilenqlikol  və qummiarabik  əsaslı birgə polimerlər mühitində formalaşan gümüş nanohissəciklərinin ölçüləri 7–9 nm, təbii poliaminosaxarid olan xitozandan istifadə etdikdə stabilləşən gümüş nanohissəciklərinin ölçüləri isə 8–11 nm aralığında dəyişir.