o-Ksilol, həmçinin 4-brom- və 4-fenil-o-ksilolların oksidləşdirici ammonolizində ilk maddədən və digər əsas məhsuldan – dinitrildən imid heterotsiklinin əmələ gəlmə xüsusiyyətləri araşdırılmış və ümumiləşdirilmişdir. Hər iki halda imid tsiklinin əmələ gəlməsinin yan orto-qrupların molekuldaxili qarşılıqlı təsirinə imkan verən daha yaxın məsafədə yerləşməsi ilə bağlı yaranan fəza effektinin hesabına olması müzakirə edilmişdir. İlk maddənin orto-metil əvəzləyicilərinin və dinitrilin orto-nitril funksional qruplarının fəza effektlərinin uyğun olaraq oksidləşdirici ammonoliz şəraitində və prosesi müşayiət edən reaksiyaların–oksidləşdirici dehidrogenləşmə və dərin oksidləşmə məhsulu suyun təsirindən oksidləşdirici tsiklləşmə ilə bağlılığı aydınlaşdırılmışdır.