Təbii və Na-formalı termiki işlənmiş bentonitdə Co²⁺ və Cd²⁺ ionlarının model məhlullardan 20–65⁰C temperatur intervalında sorbsiyası tədqiq olunmuşdur. Müxtəlif temperaturlarda həm təbii, həm də Na-forma  bentonit nümunələrində Co²⁺ və Cd²⁺  ionlarının sorbsiya miqdarının tarazılıq sabitləri hesablanmışdır. Müəyyənləşdirilmişdir ki, temperaturun artması ilə sorbentlərin tədqiq olunan ionlara qarşı sorbsiya effektivliyi artır. Bütün hallarda qatılıq və temperaturun artması  ilə Cd²⁺ ionlarının sorbsiya effektivliyi Co²⁺ ionundan yüksək olmuşdur. Kation mübadilə üsulu ilə  bentonitin modifikasiya olunmuş formasının daha yüksək sorbsiya tutumuna, paylanmanın tarazılıq əmsalı və metal kationlarının sorbsiya seçiciliyinə malik olması müəyyən olunmuşdur. Aydınlaşdırılmışdır ki, ion dəyişmə zamanı bentonit nümunələrinin şişmə qabiliyyəti və mübadilə tutumu nəzərə çarpacaq dərəcədə dəyişmiş olur.