İşdə propanın karbon qazı ilə oksidləşdirici dehidrogenləşməsi (POD) reaksiyasında alüminium oksid əsaslı vanadium-sürmə tərkibli oksid katalizatorların səth morfologiyası, faza tərkibi, maqnit və katalitik xassələrinin tədqiqinin eksperimental nəticələri verilmişdir. Göstərilmişdir ki, vanadium-alüminium və sürmə-vanadium-alüminium oksid katalizatorlarının (vanadiumun miqdarı 15, sürmənin miqdarı isə 5%-dən az olan) roentgen difraktoqramlarında  yalnız γ -Al₂O₃ fazasına aid olan reflekslər  müşahidə olunur.  Hesab edilir ki, V₂O₅ fazasına aid reflekslərin  olmaması bu katalizatorlarda vanadium oksidinin (VOx)n tərkibli polimer quruluşlar   şəklində yüksək dispersli amorf halda olması ilə əlaqədardır. 5%Sb-15%V/Al₂O₃ tərkibli katalizatorun roentgen difraktoqramlarında Sb₂O₃ və SbVO₄ fazaları üçün xarakterik olan reflekslər müşahidə olunur. EPR spektrlərindən görünür ki, +4 oksidləşmə dərəcəsində olan vanadium ionları vanadil ionları - VO²⁺ şəklindədir. Göstərilmişdir ki, vanadium-alüminium oksid katalizatorunun tərkibinə sürmənin daxil edilməsi vanadil (VO²⁺) ionlarının miqdarını və onların POD reaksiyasında aktivliyini artırır. Müəyyən edilmişdir ki, γ-Al₂O₃ daşıyıcısı POD reaksiyasında aktiv deyil və  ona vanadiumun daxil edilməsi  ilə aktivləşir. Sürmənin V/Al₂O₃ tərkibinə  daxil edilməsi katalitik aktivliyi artırır və POD reaksiyasında onların seçiciliyini əhəmiyyətli dərəcədə yaxşılaşdırır. Vanadium-sürmə-oksid quruluşlarının  əmələgəlməsi və onların iştirakı ilə POD reaksiyalarının termodinamikası tədqiq edilmişdir.

doi.org/10.32737/0005-2531-2024-3-5-19