Kadmium sink alüminium laylı ikili hidroksidləri (CdZnAl-LİH) polivinil spirti (PVS) məhlulunda karbamidlə hidroliz və birgə çökmə metodu ilə sintez olunmuşdur. Alınmış nanokompozitlər üzərində kadmium - sink sulfid (CdZnS) nanohissəcikləri həm otaq temperaturunda (25⁰C), həm də 40⁰C –də birbaşa sulfidləşmə metodu ilə sintez edilmiş və m-krezolun sulu məhlullardan təmizlənməsi üçün görünən işıqda fotokatalitik deqradasiyası öyrənilmişdir. Alınmış nanokompozitlərin Ultrabənövşəyi (UB) spektrləri və Rentgen Difraktometrləri (RD) çəkilmiş və nanohissəciklərin orta ölçüləri Scherrer düsturuna əsasən təyin olunmuşdur. CdZnAl-LIH/PVS, CdZnS@CdZnAl-LIH/PVS (25⁰C) və CdZnS@CdZnAl-LIH/PVS-də (40⁰C) nanokristalitlərin orta ölçüsü uyğun olaraq 14.25 nm, 19.05 nm və 16.5 nm-dir. Məlum olmuşdur ki, 3 saat görünən işıq altında m-krezolun sudan fotokatalitik parçalanma dərəcəsi CdZnAl-LİH/PVS ilə 18%, CdZnS@CdZnAl-LİH/PVS (25⁰C) ilə 25%, CdZnS@CdZnAl-LİH/PVS (40⁰C) ilə 29%-dir.

doi.org/10.32737/0005-2531-2024-4-76-84