Yeni hazırlanmış nikel tərkibli karbon nitrid kompozitlərinin katalitik xüsusiyyətləri asetonun izopropanola hidrogenləşdirilməsi reaksiyasında tədqiq edilmişdir. Təcrübələr qaz fazasında normal təzyiqdə və 120–200⁰C temperatur intervalında aparılmışdır. Temperaturun, katalizatorun tərkibinin, H₂/aseton molyar nisbətinin və asetonun axın sürətinin təsiri öyrənilmişdir. Ən yüksək aseton çevrilməsi və izopropanola görə seçicilik (>98-99%) 140–180⁰C-də və hidrogenin asetona 1–1.2 molyar nisbəti şəraitində müşahidə edilmişdir. Təcrübələrin yerinə yetirildiyi şəraitdə asetonun kondensasiyası məhsulları müşahidə edilməmişdir. Reaksiyanın temperaturu yüksəldikcə izopropil efirinin miqdarı bir qədər artır. Hidrogenin asetona molyar nisbəti 1–1.2 daxilində axın  sürətinin artması ilə acetonun konversiyası və izopropanol məhsuldarlığı bir qədər azalır. Bununla belə, izopropanol üçün seçiciliyin azalması asetonun çevrilməsi ilə müqayisədə daha az dərəcədə müşahidə olunur.

doi.org/10.32737/0005-2531-2025-2-104-113