Pb₂Ga₂S₅ və YbGa₂S₄ birləşmələri arasında kimyəvi qarşılıqlı təsirin təbiəti fiziki-kimyəvi analiz metodları: diferensial-termiki (DTA), rentgenfaza (RFA), mikroquruluş (MQA) analizləri və həmçinin mikrobərkliyin və sıxlığın təyini metodları vasitəsilə  tədqiq edilmiş və  Pb₂Ga₂S₅-YbGa₂S₄ sisteminin T-x faza diaqramı qurulmuşdur. Müəyyən edilmişdir ki, Pb₂Ga₂S₅-YbGa₂S₄ sistemi PbS-Ga₂S₃-YbS kvaziüçlü sisteminin kvazibinar kəsiyi olub, evtektik tiplidir. Pb₂Ga₂S₅ və YbGa₂S₄ birləşmələri arasında əmələ gələn evtektikanın tərkibi 30 mol % YbGa₂S₄, temperaturu 625^oC-dir. Pb₂Ga₂S₅-YbGa₂S₄ sistemində otaq temperaturunda hər iki birləşmələr əsasında  geniş sahədə bərk məhlul sahəsi aşkar edilmişdir. Müəyyən edilmişdir ki, sistemdə otaq temperaturunda  Pb₂Ga₂S₅ birləşməsi əsasında 12 mol % YbGa₂S₄ həll olur, YbGa₂S₄  birləşməsi əsasında isə 18 mol %  Pb₂Ga₂S₅ həllolma mövcuddur. (YbGa₂S₄)_1-x (Pb₂Ga₂S₅)_x (x=0.03; 0.05; 0.10) bərk məhlul ərintilərinin rentgenoqrafik analizi aparılmış və onların qəfəs parametrləri hesablanmışdır.  Sistemdə əmələ gələn (YbGa₂S₄)_1-x (Pb₂Ga₂S₅)_x (x=0.01; 0.03; 0.05; 0.07) bərk məhlul ərintilərinin elektrik keçiriciliyinin və termoelektrik hərəkət qüvvəsinin temperatur asılılığı öyrənilmişdir. Bərk məhlul ərintiləri yüksək müqavimətli yarımkeçirici materiallardır.

doi.org/10.32737/0005-2531-2025-3-81-89