Aminoturşular zülalların tərkibinə daxil olan və canlı orqanizmlərdə biokimyəvi proseslərdə mühüm rol oynayan xiral birləşmələrdir. Onlar üzvi sintezdə qurucu bloklar, asimmetrik sintezlərdə katalizatorların komponentləri, ayırıcı agentlər və b. kimi geniş istifadə olunurlar. Bu məqsədlə, tərəfimizdən müəyyən edilmişdir ki, 1 mol aminobutandikarbon turşusunun 1 mol allilxlorid, 1 mol (β-xlor)allilxlorid və artıqlaması ilə götürulmüş natrium hidroksidin suda məhlulunda (pH 12) qarşılıqlı təsirindən 40-45% çıxımla yeni monomer – N-allil-N-(β-xlor)­allil­amino­butandikarbon turşusu (ABT) alınır. Sintez edilmiş ABT–nin su mühitində ammonim persulfat iştirakı ilə, inisiatorun  4х10^-4–5х10^-3 mol/l  qatılığında, polimerləşmə reaksiyası (Т= 60–70 ) zamanı suda həll olan kifayət qədər yüksək özlülüklü ([η_gətir.] = 0.15–0.17dl/q)  polimer alınmışdır. Müəyyən edilmişdir ki, polimerləşmə diallil qruplarının ikiqat rabitələri hesabına tsikloxətti mexanizm üzrə pirrolidin strukturlu polimerlərin əmələgəlməsi ilə baş verir.

 doi.org/10.32737/0005-2531-2026-1-119-127