Kadmium ilə elementar kükürdün birgə çökmə prosesinin tədqiqi göstərmişdir ki, çökdürülmüş təbəqələrin keyfiyyəti, tərkibi və xassələri əsas komponentlərin qatılığı, cərəyan sıxlığı, elektrolitin temperaturu və qarışdırma kimi parametrlərdən əhəmiyyətli dərəcədə asılıdır. Bu faktorlar müxtəlif dərəcələrdə çökdürülmüş təbəqələrin tərkibinə təsir göstərir. Çökdürülmüş təbəqələrin tərkibinə müxtəlif faktorların təsirini öyrənmək məqsədilə təbəqələr qalvanostatik şəraitdə, ikielektrodlu hücrədə hazırlanmışdır; burada katod kimi nikel, anod kimi isə platin lövhə istifadə edilmişdir. Bu işdə cərəyan sıxlığının, əsas komponentlərin qatılığının, temperaturun və qarışdırmanın CdS nazik təbəqələrin tərkibinə təsiri araşdırılmışdır. Məlum olmuşdur ki, ərintinin əsas komponentlərindən birinin qatılığının artırılması onun ərintidəki miqdarını artırır. Birgə çökmə zamanı cərəyan sıxlığının artırılması kadmiumun tərkibini yüksəldir, kükürdün tərkibini isə azaldır. Cərəyan sıxlığı 10 mA/sm²-dən 20 mA/sm²-ə iki dəfə artırıldıqda, çökdürülmüş təbəqədə kükürdün tərkibi 11.3 % azalır. Elektrolitin temperaturunun yüksəlməsi təbəqələrdə kükürdün tərkibinin artmasına səbəb olur. Kadmium ilə kükürdün birgə çökmə prosesinə qarışdırmanın təsiri araşdırıldıqda məlum olmuşdur ki, eyni elektroçökmə şəraitində qarışdırma kükürdün tərkibini orta hesabla 4 % artırır.

doi.org/10.32737/0005-2531-2026-2-5-12