Argirodit ailəsi birləşmələri və onlar əsasında fazalar termoelektrik, fotoelektrik, optik və digər xassələrə malik qiymətli ekoloji təhlükəsiz funksional materiallardır. Onlar həmçinin Cu⁺ və Ag⁺ kationlarına görə ion keçiriciliyinə malikdirlər və elektrokimyəvi sensorlar, elektrodlar, elektrokimyəvi enerji çevirici cihazlarda  elektrolit materialları və s. kimi istifadə oluna bilərlər. Bu işdə Ag₈SiS₆–Ag₈SiTe₆ sistemində faza tarazlıqları differensial termiki analizi və rentgen faza analizi üsulları ilə tədqiq edilmiş və sistemin T-x faza diaqramı qurulmuşdur. Müəyyən edilmişdir ki, sistem kvazibinardır və Ag₈SiTe₆ və HT- Ag₈SiS₆ birləşmələri arasında qeyri-məhdud əvəzolunma bərk məhlulların əmələ gəlməsi ilə xarakterizə olunur. Bərk məhlulların əmələ gəlməsi ilə Ag₈SiS₆ birləşməsinin polimorf keçid temperaturu azalır. Bu, ³30 mol.% Ag₈SiTe₆ tərkibli ion keçirici kubik fazanın otaq temperaturunda və daha aşağıda stabilləşməsinə gətirib çıxarır. RT- Ag₈SiS₆ əsasında homogenlik sahəsi 10 mol.% təşkil edir. Toz difraktoqramları əsasında bərk məhlulların kristal qəfəs parametrləri hesablanmış və onların tərkibdən xətti asılı olması  göstərilmişdir

doi.org/10.32737/0005-2531-2023-2-169-177