Fiziki-kimyəvi analiz (DTA, MCA, RFA, eləcə də mikrobərkliyin və xüsusi çəkinin təyini) metod­ları ilə TlAs₂Se₃Te–TlAs₂Se₄ sistemində qarşılıqlı təsir tədqiq edilmiş və onun hal diaqramı qurul­muş­dur. Müəyyən edilmişdir ki, TlAs₂Se₃Te–TlAs₂Se₄ sistemi TlTe–TlSe–As₂Se₃ kvaziüçlü siste­mi­nin kvazi­binar kəsiyi olub, evtektik tiplidir. Sistemdə otaq temperaturunda TlAs₂Se₃Te birləşməsi əsa­sında 10 mol %, TlAs₂Se₄ birləşməsi əsasında isə 7 mol % həllolma aşkar edilmişdir. TlAs₂Se₃Te–TlAs₂Se₄ sisteminin bütün ərintiləri adi soyudulma şəraitində şüşə halında alınır.