Metal dixalkogenidləri öz bənzərsiz xassələrinə görə nano- və optoelektronikanın müxtəlif sahələrində geniş tətbiq olunurlar. Bi₂Se₃, A^V–B^VI qrupuna aid, qadağa olunmuş zolağının eni 0.3 eV olan perspektivli n-tip yarımkeçirici materiallardan biridir. Elektrokimyəvi üsul ilə bu birləşmələri birgə çökdürmək üçün ilkin olaraq başlanğıc komponentlərin elektroreduksiya prosesləri ayrılıqda tədqiq edilir. Buna görə tədqiqat etilen qlikol məhlulundan selenit ionlarının elektrokimyəvi reduksiyasına həsr edilmişdir. Pt elektrodu üzərində tsiklik və xətti polyarizasiya əyrilərinin çəkilməsi ilə selenit ionlarının elektrokimyəvi reduksiya prosesinin kinetika, mexanizmi və müxtəlif amillərin prosesə təsiri öyrənilmişdir. Temperaturun təsirinin nəticələrinə əsasən Qorbaçov metodu ilə effektiv aktivləşmə enerjisi hesablanmışdır. Hesablamaların nəticələri göstərir ki, etilenqlikol məhlullarından selenit ionlarının elektrokimyəvi reduksiya prosesi qatılıq kinetikasına yaxın olan elektrokimyəvi kinetika ilə müşayiət olunur

doi.org/10.32737/0005-2531-2020-4-43-48