Argirodit ailəsi birləşmələri qarışıq ion-elektron keçiriciliyinə, maraqlı termoelektrik, fotoelektrik, optik və s. xassələrə malik qiymətli ekoloji təhlükəsiz funksional materiallardır. İşdə bu ailəyə aid olan Cu₈GeS₆ və Cu₈GeSe₆ birlşmələrinin Cu⁺ keçiriciliyə malik Cu₄RbCl₃I₂ bərk elektrolitli qatılıq dövrələrinin elektrik hərəkət qüvvəsinin (EHQ) ölçülməsi ilə termodinamik tədqiqinin nəticələri təqdim olunur. EHQ ölşmələri əsasında müvafiq olaraq 330 və 335 K –də polimorf çevrilməyə məruz qalan bu birləşmələrin hər iki kristallik modifikasiyalarında misin parsial molyar funksiyaları hesablanmışdır. Cu–Ge–S(Se) sistemlərinin bərkfaza tarazlıqları diaqramları əsasında bu parsial molyar kəmiyyətlərə uyğun potensialəmələgətirici reaksiyalar müəyyən edilmiş, Cu₈GeS₆ və Cu₈GeSe₆ birlşmələrinin hər iki kristallik modifikasiyalarının əmələgəlmə termodinamik funksiyaları və mütləq entropiyaları, həmçinin bu birləşmələrin polimorf çevrilmə termodinamik funksiyaları hesablanmışdır. İşdə həmçinin argirodit ailəsi birləşmələrinin termodinamik xassələrinə aid ədəbiyyat məlumatları verilmiş və araşdırılmışdır

doi.org/10.32737/0005-2531-2023-4-21-30